معلومات لا تعرفها عن اللغة العبرية !

 

مصر مقصرة جدا نحو موضوع تصدير العقار..

بنسمع كل يوم عن مؤتمرات وورش عمل وتصريحات مسؤلين ورجال اعمال ومطورين عقاريين ان مصر ضروري تركز جهودها بالترويج لتصدير العقار - بيقولوا ان ده الحل الوحيد لتنشيط السوق العقاري والخروج من دوامة الركود او الوصول لمرحلة انفجار الفقاعة (اللي مفروض انفجرت من زمان بس احنا مش مصدقين) وكمان نقلل الفائض الضخم اللي عندنا من البناء ومن ملايين الوحدات المعروضة بلا مشتري الان .. طيب ايه بقي حكاية تصدير العقار دي عشان لسه بعض الناس اللي بيقولوا انهم دكتوراه في الهندسة وبنوا ناطحات سحاب بدول الخليج ماسمعوش عنها حاجة ؟؟!! الموضوع بمنتهي البساطة هو ترويج بيع العقارات بمصر لأفراد وشركات ومستثمرين عرب واجانب وبالذات المستثمر الخليجي لأنهم اكتر ناس بيستثمروا اموالهم في العقار وعشان عندهم تشبع في بلادهم في مجال الاستثمار العقاري بيتجهوا ومن زمن طويل يوظفوا اموالهم وفوائضهم من عائدات البترول لشراء العقارات خارج بلادهم.. وطبعا هم دائمي البحث عن شراء العقار الذي يدر اكبر عائد جاري واضخم عائد رأسمالي - وبالمناسبة العائد الجاري يأتي من عائدات الايجار او استغلال العقار في اي نشاط يدر عائد دوري اما العائد الرأسمالي فيأتي عند بيع العقار بسعر اعلي كثيرا عن سعر شراؤه ده بعد طبعا ما يكون حقق عائدات جارية كبيرة تصل في بعض الاحيان لتحقيق القيمة الاستردادية للعقار - طيب بيشتروا فين بقي الخليجيين والناس اللي عندهم فلوس عموما؟؟ .. في اي دول يعني بيشتروا هذه العقارات؟؟ .. طبعا المعلومات متاحة للجميع والاحصائيات ممكن نرجع لها سنجدهم يتجهوا لشراء العقار في امريكا بنيويورك وميامي وكاليفورنيا يشتروا في انجلترا بلندن العاصمة وفي جميع انحاء اسبانيا حيث وفرة العقارات ذات الطراز الحديث بالمناطق السياحية وبعضهم يفضل الاستثمار في العقارات ذات الطراز العريق والقديم.. يشترون ايضا في السويد والعديد من دول شرق اوروبا الصاعدة وحتي تركيا والمغرب...

طيب ومصر ؟؟؟!!! اه ان شاء الله حيشتروا... بس يشتروا ازاي بقي وفين؟؟؟ حيشتروا عقارات الايجار القديم المخلعة رغم موقعها الفريد في القاهرة والمدن الكبري العريقة بأرقي الاحياء وعلي كورنيش النيل والاماكن الاثرية.. عقارات - كانت جميلة - لكن للاسف لم تعد كذلك ده غير خضوعها لقانون عبيط يجعلها لا تحقق اي عائد ولا جاري ولا رأسمالي.. طيب يشتروا ويدفعوا للملاك اي حاجة وبعدين يراضوا المستأجرين ويهدوا يستفيدوا بالارض ويبنوا برج حديث فيها ايه يعني؟؟ .. فيها ان تكلفة الارض ستكون مرتفعة جدا جدا وبعد كده يصطدموا باللوائح الجديدة لتنظيم البناء وممكن لا يسمحوا لهم سوي بعقار لا يزيد ارتفاعه عن 4 ادوار... خلاص يشتروا في العشوائيات... عقارات جميلة وحلوة ابراج علي الطوب الاحمر لازقة في بعضها وكلها مخالفة وبتتصالح...!! بلاش ياسيدي العشوائيات سيبها للمصريين الغلابة... مالها المدن الجديدة عندنا ملايين الوحدات تنتظر (المضارب) اقصد المشتري وحاجة تشرح القلب... عيبها الحقيقة مش بتحقق اي عائد جاري اصل المدن فاضية وكثافة سكانية شبه منعدمة عكس القاهرة والمدن التانية... طيب بسيطة في عيب تاني؟؟ اه الحقيقة حاليا مفيش عائد رأسمالي ده احتمال حتي تحقق خسارة بعد ما تشتري الوحدة وتسقعها سنتين تلاته.. بس معلش برده مش اشكال دي ظروف مؤقته تتعدل ان شاء الله ونرجع زي زمان اللي يشتري وحدة نص تشطيب بمليون جنيه ينساها سنتين تلاته ويرجع يبيعها تاني زي ماهي برده نص تشطيب ب 2 و 3 مليون... بلاش النظرة المتشائمة دي لآنها ظروف وتعدي... يمكن اللي احنا فيه ده بسبب الكورونا والشاطر اللي يشتري دلوقتي تروح الكورونا من هنا ويجني هو الارباح من هنا!!!

يا اخوانا يابتوع تصدير العقار قبل ما تنادوا بتصدير العقار اظبطوا اولا السوق العقاري المصري او بمعني اصح العك العقاري المصري.. اصلحوا التشريعات البالية عدلوا الحوافز الضريبية المعكوسة اللي بتفرض علي المطور العقاري اللي بيسابق الزمن عشان يبني بآقصي طاقة ممكنة في الوقت اللي مفيش فيه مشتري ضريبة واحدة فقط هي ضريبة الارباح التجارية والصناعية وغالبا يتهرب من دفع معظمها بينما المستثمر المنكوب بقوانين بالية تمنعه من تحقيق اي عائد تفرض عليه 4 انواع من الضرائب وبرده يتهرب من دفعها..

علماؤنا الاجلاء بمجلس النواب واساتذة الهندسة الذين يحتلون ويحتكرون مقاعد لجنة الاسكان به ماهي انجازتهم في حل هذه المعضلة وازالة التشوهات والمتناقضات  الجاسمة علي صدر السوق العقاري بمصر ام انتم في الاصل سبب الازمة وسبب هذا الخلل المزمن.. اذا كان كذلك فلماذا لا ترفعوا يدكم عن هذه الملفات الاقتصادية وتسلمونها لخبراء الاقتصاد فهم ادري واعلم عن كيفية الحل.. لماذا لا تركزون علي تخصصاتكم الهندسية والفنية لمعالجة تشوهات واجهات المباني بل وانهياراتها لماذا لا يلفت نظركم الارصفة المكسرة والطرق التي ترصف حديثا بينما بلاعات الصرف تبتلع وتحطم السيارات التي تستخدم الطريق..

اصلحوا احوال السوق العقاري بمصر وعالجوا الخلل المزمن بشكل جذري بعيدا عن التوصيات والحلول السطحية والمسكنات..