مباحث نسائية في الكويت لاول مرة

 

مراد منير - مساحة رأي

يا أخي قانون الايجار القديم ده اللي عمله كان قاصد يضحك الناس.. القانون في حد ذاته مضحك جدا والدليل علي كده واحد مصري مقيم بأسبانيا وعنده الجنسية ومتضرر جدا من هذا القانون عشان عنده بيت في مصر من ابو شلن ده.. يعمل ايه بقي جاب 3 محامين اسبان وجاب لهم محامي مصري كمترجم وقالهم ادرسوا الكلام ده عشان حرفع قضية دولية علي الحكومة المصرية.. الناس كانوا طول الوقت يضحكوا.. ههه.. امنعوا الضحك... مفيش فايدة.. يا اخونا اشتغلوا بدل الضحك ده.. الناس مش قادرين فطسانين علي روحهم من الضحك..

الغريب في الامر تجد ناس جد جدا مسئولين كبار ونواب في البرلمان واعلاميين كبار.. وقال ايه بناقش تعديل القانون.. وبناقش نعدله ازاي وكمان نعدله من الاساس ولا لأ...

مفيش حد بيقول نلغيه.. احسن حرام نلغيه.. الناس تضحك ازاي طه..

عربية وقعت في البحر.. عملت حادثة كبيرة الاول واتكسرت خالص بعدين وقعت في قاع البحر.. والناس - بعد 100 سنة - لما طلعوها وجدوا الاربع عجلات منفصلين تماما عن العربية وكل زجاج العربية مدشدش.. الموتور شرب مية مالحة لما شبع وباش خالص كل السيور اتقطعت طبعا والدركسيون وعصاية الدركسيون اتعوجوا.. الشاسيه بالاضافة انه اتبهدل خالص من الحادثة لكن كمان هو وبودي العربية بقوا زي المنخل.. الفرش طبعا اتهري في الميه والملح.. يمكن المساحة لسه سليمة..

كل ده وفي ناس يقولوا لك تتصلح..

ههه ربنا يصلح الحال..

تمام كده زي الايجار القديم.. يقول لك نعدله..

ياعم حتعدل ايه بس الله لا يسيئك.. الغيه ربنا مايوقعك في ضيقة.. لا حنعدله.. بس مش عارفين نعدله ازاي.. بس ان شاء الله حنعدله.. عايزين بس وقت عشان نعدله.. خلاص حنعدله.. متقلقوش حنعدله اهه.. ياسيدي ما ينفعش فيه تعديل ده الغيه نبوس ايديك حنموت م الضحك كده.. متنا والله م الضحك حنفطس كفاية كده.. وربنا لا نعدله.. ده خلاص حنعدله.. ياسيدنا تعدل ايه ده حتي اسمه قديم زي الج... القديمة كده المقطعة حتعدل فيها ايه دي.. معلش حنعدله ولا ضرر ولا ضرار وقريب نعدله..

يارب عدلها من عندك بقي!!